***
Башта суга ташлыйсың,
Аннан көтә башлыйсың.
Өметләнеп аласың,
Өлгералмый каласың.
Тагын суга ташлыйсың;
Өр-яңадан башлыйсың.
(Кармак белән балык тоту)
***
Кызлар карап туя алмый,
Карыйлар да карыйлар.
Аңа карап елмаялар,
Йә чәчләрен тарыйлар.
Кайчак аңа малайлар да
Карап-карап алгалый.
Хәтта әби-бабайлар да
Яшертен күз салгалый.
(Көзге)
***
Күрсәтәм мин җилнең көчен
Һәм аның юнәлешен.
Башка вазыйфам юк минем.
Шул була бөтен эшем.
(Флюгер)
***
Без буйга да үттек, ди,
Аркылыга үттек, ди.
Тирләп-пешеп беттек, ди.
Шуңа да без … ди.
(Үтүк)
***
Почмакта бер суык кыш,
Исеме аның – …
(Суыткыч)
***
Бертуктамый йөзәбез,
Йә төшәбез кар булып.
Йә төшәбез яңгыр булып,
Ә исемебез …
(Болыт)
***
Тотам дисәң тоттырмый,
Ялык-йолык итә ул.
Болыт белән килә дә
Болыт белән китә ул.
(Яшен)
***
Баш астына саласың
Һәм йокыга таласың.
(Мендәр)
***
Утырган килеш йөри,
Тик торган килеш йөри.
Суга салып та йөри,
Соңга калып та йөри.
Очып барганда йөри,
Утын ярганда йөри,
Кайчак күз салмаса да,
Кешеләр тагып йөри.
(Сәгать)
***
Әтиләр аны һәрвакыт
Билгә буып йөртәләр.
Кайчак безгә акылны да
Шуның белән кертәләр.
(Каеш)
***
Эче тулы ком гына,
Агып тора тын гына.
Вакыт санап, эшендә
Ярдәм итә кешегә.
(Ком сәгате)
***
Җаным булмаса да, синең
Хезмәтчең булырмын, ди.
Үземнең акылым белән
Игелек кылырмын, ди.
(Компьютер)
***
Шомасын шома булсам да,
Ялкаулыкны яратмыйм.
Яныгызда булам икән,
Тәнегезне каралтмыйм.
(Сабын)
***
Кешеләрне бик ярата,
Ләкин никтер кадала.
Шәфкать туташы да түгел,
Үзе бездән кан ала.
(Талпан)
***
Агуын да, угын да
Үзе белән йөртә ул.
Ачуы килгәннәргә
Икесен дә кертә ул.
(Бал корты)
***
Язын җиргә күмәбез.
Аннан тагын күмәбез.
Агулыйбыз, алабыз
Һәм сакларга салабыз.
(Бәрәңге)
***
Кышкы салкында курыкмый,
Белми көнен – төнен дә.
Рәхәтләнеп йоклап ята
Ул үзенең өнендә.
(Аю)
***
Безли – безли,
Нидер эзли.
Тешләмичә,
Тәки түзми.
(Черки)
***
Тешләремнең исәбе юк,
Утын кисәм, он ясыйм.
Егет булсаң, кадерне бел,
Мине читкә куйма син.
(Пычкы)
***
Гомер буе
Сугар өчен,
Мине уйлап тапканнар.
Нигә «суккыч» диеп түгел,
Башка исем такканнар?
(Чүкеч)
***
Бар очым,
Бар түбәм.
Сугалар –
Мин түзәм.
Кайчакта
Кәпрәям:
Тутыгам,
Кәкрәям.
(Кадак)
***
Шак та шок,
Шак та шок
Тукмыйлар үземне.
Мин эшлим,
Мин тишәм,
Мин шундый түземле.
(Өтерге)
***
Тешлим дә
Суырам.
Йә тешләп
Өзәм мин.
Тик ятсам – тутыгам,
Ә эшкә түзәм мин.
(Келәшчә)
***
Хезмәтем бик кечкенә,
Кирәк бары көч кенә.
Менә шушы тактаны
Мине бор да тиш кенә.
(Борау)
***
Ансыз бармый төзелеш,
Ул – турылап торучы.
Озын койрыклы тычкан –
Биек йортлар коручы.
(Асма)
***
Этәләр дә тарталар,
Этәләр дә тарталар.
Мине тотып, тактаны
Нәкъ шулай шомарталар.
(Фуганка)
***
Киемнәре ыңгырчак һәм
Камыт, дуга, дилбегә.
Инде ничә гасыр буе
Кешеләргә бил бөгә.
(Ат)
***
Кып – кызыл аяклары,
Була көрән, аклары.
Искә төшә элгәре
Хат ташыган чаклары.
(Күгәрчен)
***
Балык кебек йөзә ул,
Океаннар гизә ул.
Баласына, кадерләп,
Тәмле сөт имезә ул.
(Кит)
***
Балык дисәң дә балык!..
Тора халык таң калып.
Тәмле прәннек, кәнфитне
Ашый кулыңнан алып.
(Дельфин)
***
Бөтен вазифам – сеңдерү,
Кешеләр сөендерү.
Мин – чисталык сагында,
Рәхмәт укыйм сабынга.
(Сөлге)
***
Үзем дә ап–ак,
Эзем дә ап–ак.
Белем бирәм, дип
Сызылам кат – кат.
(Акбур)
***
Урамда да, буранда да,
Дәрестә дә сайрый ул.
“Минем белән сөйләш әле”, —
Диеп кенә сорый ул.
(Кесә телефоны)
Мөҗәһит Әхмәтҗанов,
шагыйрь, Абдулла Алиш, Саҗидә Сөләйманова исемендәге бүләкләр иясе, халык мәгарифе отличнигы, Татарстанның атказанган укытучысы, Мөслим районының мактаулы гражданины